NoDictionaries   Text notes for  
Postquam Marcus fīnem recitandī fēcit,...

Postquam Marcus finem recitandi fecit Grammaticus, “ Illi versus bene recitati sunt. Nunc dic mihi hoc! Quot verba sunt in primo versu?” “Quinque.” “Sed quot in secundo versu?” “Octo.” “Quid de verbo conticuēre mihi dicere potes?” “Conticuere est idem ac conticuerunt. Sic verbum saepe scribunt poetae.” “Bene respondisti. Et tu, Aule, dic mihi hoc! Qui sunt omnes?” “Troiani unā cum regina et comitibus.” “Ubi sunt hi omnes?” “in Africa.” “Quo in loco?” “Carthagini.” “Unde venit Aeneas?” “Troiā.” “Quo itinere Troiā navigavit?” “Primum ad Siciliam venit; deinde tempestate Carthaginem actus est.” “Multa de hac fabula omittis nam Aeneas comitesque multos annos errabant antequam ad Siciliam advenerunt.” Primum ad Thraciam deinde Delum tum ad Cretam navigaverunt. Cur nusquam moratus est Aeneas, Marce?” “Monitus a dis, Aeneas semper Hesperiam petebat. Volebat novam condere Troiam.” Omnes discipuli grammaticum attente audiebant -- praeter Sextum, qui dormitabat. Quem (Sextum) ubi animadvertit grammaticus, “Sexte,” clamavit, “Expergiscere! Dic mihi Ubi est Hesperia?” “Hesperia? Nonne est Graecia?” “Minime, o puer abominande! Hesperia est Italia>” “Nil interest,” mussavit Sextus. “At maxime interest,” respondit grammaticus, irā maximā commotus. Ferulam sumpsit et voce terribili, “Extende manum, Sexte!” clamavit. Ceteri discipuli conticuerunt. At Sextus grammatico non paruit. “Non extendam.” Stupuit grammaticus. Longum fuit silentium. Tandem, “Abi, puer!” clamat. “Voca Eucleidem paedagogum! Ille te domum ducet. Satis procacitatis tuae passus sum. Te huc redire veto, nisi laborare voles. Nunc abi!” Ceteri discipuli verbis grammatici territi erant. Numquam antea puer domum missus erat.